Kurti: Asociacioni është në marrëveshje, nuk është vetë marrëveshja

Zyra e kryeministrit

Gjatë qëndrimit të javës së shkuar në Kosovë, emisari për dialogun, Miroslav Lajçak, u ka ofruar Kosovës dhe Serbisë dokumente, sipas të cilave duhet të vazhdojet me dialogun.

E kryeministri i Kosovës, Albin Kurti, tha se është propozuar zbatimi i sekuencuar i marrëveshjes për normalizim, gjë të cilën Kosova e ka refuzuar.

“Natyrisht, se neni 7 është pjesë e marrëveshjes, por neni 7 nuk është marrëveshja dhe këtë gjë zëvendëskryeministri Bislimi e ka bërë të qartë mbrëmë në Bruksel dhe gjithashtu kemi theksuar se dëshirojmë një plan zbatimi, i cili është i hollësishëm, konkret, i balancuar dhe gjithëpërfshirës. Nuk mund të jetë plani i zbatimit i sekuencuar për marrëveshjen që e kemi bërë, vetëm në nenin 7”, ka deklaruar Kurti, përcjell albinfo.ch.

Ai ka shtuar se Serbia nuk është e interesuar të zbatojë marrëveshjen.

Në anën tjetër, edhe Presidentja e Kosovës, Vjosa Osmani, ka qenë më e ashpër karshi propozimit që ka sjellë emisari Miroslav Lajçak të enjtën e shkuar që ishte në Kosovë.

“Kosovës nuk duhet t’i kërkohet të bëjë diçka që fare nuk është në marrëveshje”, është shprehur presidentja, përcjell albinfo.ch.

Të hënën është zhvilluar takimi i parë pas bisedimeve të 2 majit në Bruksel, në nivel kryenegociatorësh.

Kreu i delegacionit të Kosovës, Besnik Bislimi, pas takimit ka thënë që Serbia nuk është shprehur e gatshme të diskutojë, duke kërkuar vetëm themelimin e Asociacionit të Komunave me shumicë serbe.