Kosova

Kurti: Nuk mund të vazhdojmë pafundësisht me 3.5% legjitimitet në veri, besoj në zgjedhje të parakohshme

Kryeministri i Kosovës, Albin Kurti, në një intervistë për mediumin NBC në Shtetet e Bashkuara të Amerikës ka thënë se është i gatshëm për depërshkallëzim të situatës në veri, pasi që siç u shpreh ai, nuk mund të vazhdohet pafundësisht me legjitimitet të ulët që e kanë kryetarët e katër komunave veriore.

“Duhet të sigurohemi që do të kemi zbatim të aneksit që e kemi pranuar në Bruksel bashkë me Serbinë. Kjo marrëveshje ka në vetvete njohjen defacto. Mendoj që normalizimi duhet të bëhet me implementim. Për deeskalim duhet që këto banda të kthehen në Serbi, sepse nga atje kanë ardhur ose të arrestohen në Kosovë dhe pastaj, sigurisht që do të kemi zgjedhje të parakohshme, sepse nuk mund të vazhdojmë pafundësisht me 3.5% legjitimitet dhe na duhet që Bashkimi Evropian të jetë aktiv në dialog”, u shpreh Kurti, përcjell albinfo.ch.

I pyetur pse Kosova nuk e cakton një datë të zgjedhjeve dhe të bëjë hapin e parë për depërshkallëzim të situatës, kreu i Qeverisë së Kosovës u shpreh se detajet do të bisedohen në takimin e javës së ardhshme që do të ketë me emisarët e BE-së dhe SHBA-së.

“Javën e ardhshme, të dërguarit e BE-së dhe SHBA-së, Miroslav Lajcak dhe Gabriel Escobar, do të vijnë në Kosovë dhe do të diskutojmë detajet. Besoj në zgjedhjet e parakohshme, por duhet të ketë zbatim të ligjit për fushatë të drejtë dhe të lirë, për zgjedhje të lira dhe të drejta”, tha Kurti, përcjell albinfo.ch.