“Dy hoxhallarë më mashtruan, ISIS më torturoi”

Një shtetas kosovar ka rrëfyer peripecitë e tij në Siri, se si ka përfunduar në ushtrinë e Shtetit Islamik dhe rrugën nga burgjet e ISIS-it në burgjet e Kosovës

Një qytetari i Kosovës, i cili kishte qenë pjesë e grupit terrorist ISIS në Siri e Irak, ka rrëfyer peripecitë e tij nga Kosova deri në “Sham”. Ai thotë se ka ra pre e mashtrimeve të dy imamëve shqiptarë, derisa kur ka shkuar në Siri është keqtrajtuar dhe maltretuar shumë keq nga xhihadistët e ISIS.

Ky kosovar tashmë është thirrur si dëshmitar në procesin gjyqësor kundër të akuzuarve Kastriot Halimi, Hajrullah Aliu dhe Dardan Kërqeli. Ai thotë të jetë mashtruar nga imamët dhe torturuar nga terroristët. Ata e mbanin të mbyllur në qeli dhe kur hetuesit vinin, u lidhnin sytë, ndërsa i merrnin në pyetje. Vazhdimisht i kërcënonin se do t’i vrisnin.

“Nuk mungonin torturat psikologjike dhe nganjëherë edhe ato fizike. Këta nuk ishin hetues të zakonshëm, por pjesë e strukturave të zbatimit të variantit më ekstrem të ligjit fetar, të të ashtuquajturit Shtet Islamik i Irakut dhe Levantit”, kujton kosovari F.S. në sallën e gjyqit, i cili ishte i mitur kur u arrestua për pjesëmarrje në organizata terroriste kur u kthye në Kosovë, dhe më pas u dënua me burg për të njëjtën vepër, sipas gazetës “Express” citon BallkanWeb.

Bashkë me një grup tjetër kosovarësh ai kishte udhëtuar për në Siri në shkurt të vitit 2015 dhe ishte kthyer në Kosovë në maj të të njëjtit vit.

Ndonëse i riu nga Ferizaj pretendon se kishte udhëtuar në zonën e konfliktit për të ndihmuar popullin sirian dhe më pas kishte mbetur i burgosur në duart e ISIS-it, sërish sistemi i drejtësisë së Kosovës nuk ngurroi ta burgoste.

I ftuar nga Prokuroria Speciale, ai ishte dëshmitar në seancën gjyqësore kundër të akuzuarve Kastriot Halimi, Hajrullah Aliu dhe Dardan Kërqeli. “Prej Kosovës deri në Siri kam udhëtuar me personat Kastriot Halimi, Kujtim Xheladini, Hashim Alija, Valon Alija dhe Florent Bajrami”, tha F.S, transmeton Albinfo.Ch

“Familjen nuk e kam njoftuar për shkuarjen time ngaqë kam menduar që prindërit do të kundërshtonin”, tregon më tej ai.

Dëshmitari tha se ishte njohur me Kastriot Halimin, kurse për Hajrullah Aliun tha se vetëm ka lexuar nëpër gazeta që është hoxhë, ndërsa për Dardan Kërqelin tha se nuk e njihte fare. Ai tregoi para trupit gjykues rrugëtimin nga Ferizaj deri në territorin e kontrolluar nga ISIS-i në Siri.

“Unë me Kastriotin fillimisht jemi takuar në Ferizaj ditën kur jemi nisur për në Siri, e më pas me taksi kemi shkuar deri në Shkup, dhe prej Shkupit deri në Stamboll kemi shkuar së bashku me aeroplan, pastaj nga Stambolli deri në Gaziantep, pikë kufitare mes Sirisë dhe Turqisë, brenda zonës që kontrollohet nga Shteti Islamik”, tregoi F.S.

Në gjykatë ai tha se motivi i shkuarjes në Siri “ka qenë çështje humaniteti dhe dhembshuria për çdo fëmijë dhe çdo njeri të pafajshëm që pëson prej asaj lufte”. Sipas tij, ligjërimet e hoxhallarëve në internet nga Shqipëria dhe Kosova kishin ndikuar që ai të bindej për të marrë aventurën e rrezikshme drejt zonës së konfliktit.

“Kam dëgjuar në internet ligjërimet e hoxhallarëve Ahmed Kalaja nga Shqipëria dhe Fatmir Latifi nga Mitrovica, po ashtu porositë profetike të profetit, që thërret që toka e Shamit apo e Levantit që është një pjesë e Sirisë të jetë e mbrojtur dhe e përkrahur nga myslimanët”, – tha F.S.

Por dëshmitari tha se qëllimi i tij për kontribut paqësor nuk ishte realizuar, sepse pasi kishin rënë në duart e luftëtarëve të ISIS-it, atyre u ishte kërkuar që të merrnin pjesë në luftime. “Gjërat qëndronin ndryshe atje”, shpjegon ai.

“Militantët e Shtetit Islamik na kanë thënë se nuk mund të ndihmonim vetëm popullin, por domosdoshmërish duhej të merrnim pjesë në luftë. Si çdo mendje racionale unë vendosa të kthehem në Kosovë”, tha ai.

Dëshmitari shpjegoi se në momentin që ai kishte shprehur dëshirën që të kthehej në Kosovë, iu nënshtrua torturave nga pjesëtarët e ISIS-it, pasi ata dyshonin se mos ishte ndonjë agjent sekret i shtetit, ndaj dhe e kishin dërguar në burgun e tyre në qytetin Raka.

“Në momentin që jam ndarë nga Kastrioti, mua me disa persona të tjerë na kanë dërguar me makina me sy të mbyllur në burgun e militantëve në qytetin Raka të Sirisë, ku kemi qëndruar rreth 4 muaj, ku aty u jemi nënshtruar të gjitha torturave psikike e rrallëherë edhe fizike”, tregoi ai, i cili ishte i vetmi shqiptar në atë burg dhe merrej në pyetje në gjuhën angleze.

“Pas katër muajve, militantët e panë që nuk kisha asnjë lloj përfitimi, gjetën mëshirë në zemrën e tyre dhe na liruan”, tha dëshmitari.

---