Archives

Bitcoin kalon 72,000 dollarë pas zhvillimeve gjeopolitike

Posted on by Alb

Tregu i kriptomonedhave ka shënuar rritje të fortë gjatë orëve të fundit, ku Bitcoin (BTC) ka kaluar vlerën e 72,000 dollarëve. Kjo rritje vjen si reagim i investitorëve ndaj lajmeve për një armëpushim të përkohshëm mes Shteteve të Bashkuara dhe Iranit.

Reagimi i tregjeve pas armëpushimit

Lajmi për një pezullim dyjavor të konfliktit ka sjellë qetësi në tregjet financiare globale. Si rezultat, Bitcoin u rrit me rreth 5% brenda një dite, duke reflektuar rritjen e besimit të investitorëve në asetet me rrezik më të lartë.

Ndikimi u ndje edhe në sektorë të tjerë:

Nafta: çmimet ranë dhe tregjet u stabilizuan
Valutat ndërkombëtare: u lehtësua presioni i ditëve të fundit

Pasiguria vazhdon

Megjithëse tregjet po tregojnë shenja stabilizimi, analistët paralajmërojnë se situata mbetet e brishtë. Armëpushimi është i përkohshëm dhe çdo përshkallëzim i ri mund të sjellë përsëri paqëndrueshmëri.
Sipas ekspertëve, rritja e Bitcoin-it tregon edhe një herë se zhvillimet globale dhe tensionet gjeopolitike ndikojnë drejtpërdrejt në tregjet financiare dhe vendimet e investitorëve në mbarë botën.

Mësuesi nga Zvicra, Vaxhid Sejdiu, nderohet me “Shqiponjën e Artë” në Samitin e Diasporës në Tiranë

Posted on by Alb

Mësuesi i shkollës shqipe në Zvicër, Vaxhid Sejdiu, është vlerësuar me çmimin “Shqiponja e Artë” në kuadër të Samiti i IV i Diasporës, i cili u zhvillua në Tiranë.

Ky çmim jepet për kontribut të veçantë në ruajtjen dhe promovimin e gjuhës shqipe në diasporë. Sejdiu është i njohur për punën e tij me nxënësit shqiptarë në Zvicër, ku ka kontribuar në mësimin dhe përhapjen e kulturës shqiptare.

Ceremonia e ndarjes së çmimeve mblodhi figura të ndryshme të diasporës shqiptare nga shumë vende të botës, duke vlerësuar individët që kanë dhënë kontribut të rëndësishëm në ruajtjen e identitetit kombëtar.

Rrjedhje të dhënash në Booking.com: Pse të dhënat e vjedhura janë të rrezikshme

Posted on by Alb

Një sulm kibernetik në platformën e njohur të rezervimeve Booking.com ka ekspozuar të dhënat personale të disa përdoruesve, duke rritur rrezikun për mashtrime dhe sulme phishing.

Sipas kompanisë, sulmuesit kanë arritur të kenë qasje në të dhëna që lidhen me rezervimet e klientëve, përfshirë emrat, adresat e email-it dhe numrat e telefonit. Megjithatë, fjalëkalimet dhe të dhënat bankare nuk janë prekur.

Çfarë të dhënash janë komprometuar?

Të dhënat e vjedhura përfshijnë kryesisht:

detajet e rezervimeve të akomodimit,

emrat e klientëve,

adresat e email-it,

numrat e telefonit.

Sipas Booking.com, nuk janë prekur adresat postare, fjalëkalimet apo informacionet e kartave të kreditit.

Si reagoi Booking.com?

Kompanisë u ka dërguar email përdoruesve që mund të jenë prekur, duke i informuar për “aktivitet të dyshimtë” ku palë të paautorizuara kanë pasur qasje në të dhënat e rezervimeve.

Gjithashtu, disa numra referencë të rezervimeve janë ndryshuar si masë sigurie për të mbrojtur përdoruesit.

Pse është ky incident i rrezikshëm?

Edhe pse nuk janë vjedhur të dhëna financiare, incidenti mbetet serioz sepse sulmuesit tani mund të dinë:

kush ka bërë rezervim,

ku dhe kur do të udhëtojë përdoruesi.

Kjo i lejon ata të krijojnë mashtrime shumë më të besueshme, duke u shtirur si hotele apo platforma zyrtare për të kërkuar të dhëna bankare apo pagesa.

Si funksionojnë mashtrimet e mundshme?

Kriminelët mund të kontaktojnë përdoruesit përmes email-it ose telefonit duke u paraqitur si Booking.com ose si vetë hoteli, me qëllim:

marrjen e të dhënave të kartës së kreditit,

kërkimin e pagesave të rreme,

ose ndryshimin e kushteve të rezervimit.

Si të mbroheni?

Booking.com thekson se:

nuk kërkon kurrë të dhëna të kartës së kreditit përmes email-it, telefonit, SMS-ve apo WhatsApp-it,

nuk kërkon transferta bankare jashtë kushteve të rezervimit.

Në rast dyshimi, përdoruesit këshillohen të kontaktojnë drejtpërdrejt shërbimin zyrtar të klientëve dhe të mos klikojnë në linke të dyshimta.

Çfarë po bën kompania?

Booking.com deklaron se po përdor ekipe të specializuara dhe sisteme të bazuara në inteligjencë artificiale për të monitoruar dhe bllokuar aktivitetet e dyshimta 24 orë në ditë.

Sipas kompanisë, industria e udhëtimeve është bërë gjithnjë e më shumë objektiv i sulmeve kibernetike, ndaj masat e sigurisë po forcohen vazhdimisht.

Zvicra jep me shumë kujdes vizat humanitare për të ikur nga Gaza

Posted on by Alb

Zvicra po vazhdon të lëshojë vizat humanitare në mënyrë të kufizuar për personat që kërkojnë të largohen nga Rripi i Gazës. Sipas të dhënave të Sekretariatit Shtetëror për Migracion (SEM), politika mbetet e rreptë pavarësisht kritikave nga organizatat për të drejtat e njeriut.

Nga vjeshta e vitit 2023 deri në shkurt 2026, Zvicra ka miratuar gjithsej 154 viza humanitare për persona nga territoret palestineze. Shumica e tyre, 98 raste, lidhen me familjarët e 20 fëmijëve të sëmurë nga Gaza që u pranuan në Zvicër në kuadër të një evakuimi mjekësor të koordinuar nga Konfederata dhe kantonet, transmeton albinfo.ch.

Gjatë së njëjtës periudhë, SEM ka regjistruar 301 aplikime për viza humanitare nga territori palestinez, ndërsa rreth 129 kërkesa janë refuzuar.

Raste familjare dhe vendime të ndara

Për shumë familje, procesi i aplikimit ka qenë i ndërlikuar dhe shpesh me vendime të ndryshme brenda së njëjtës familje. Disa anëtarë të familjeve janë pranuar, ndërsa të tjerë janë refuzuar fillimisht.

Në Gjenevë, familja Alazbat është një nga rastet e prekura. Anëtarë të ndryshëm të familjes kanë arritur të marrin vizat humanitare, ndërsa disa kërkesa fillimisht janë refuzuar dhe më pas janë pranuar pas ankesave ligjore.

Një anëtar i familjes, që jeton prej vitesh në Gjenevë, ka deklaruar për RTS se situata në Gaza ka qenë “jashtëzakonisht e vështirë”, me mungesë strehimi, ushqimi dhe shërbimesh bazë si shëndetësia dhe shkollimi.

Raste të dhimbshme dhe pasoja fatale

Një tjetër rast i përmendur nga raportimi tregon për një aplikim të refuzuar për bashkim familjar, ku nëna e aplikuesit ka ndërruar jetë për shkak të gjendjes së saj shëndetësore, përpara se të përfundonte procesi i ankimimit.

Sipas rregullave, personat që marrin vizë humanitare mund të qëndrojnë deri në 90 ditë në Zvicër dhe më pas duhet të paraqesin kërkesë për azil nëse duan mbrojtje afatgjatë.

Kritika për politikën e Zvicrës

Organizatat për të drejtat e azilit dhe ekspertët e fushës e kanë kritikuar politikën zvicerane si tepër të kufizuar dhe të vështirë për t’u zbatuar në praktikë, veçanërisht për shkak të situatës në Gaza dhe vështirësive për sigurimin e dokumenteve.

Sipas tyre, kërkesat administrative janë shpesh të pamundura për t’u përmbushur në terren, ndërsa vendimet shpesh nuk janë të mjaftueshëm të arsyetuara.

Qëndrimi i autoriteteve zvicerane

Nga ana tjetër, SEM mbron praktikën e saj, duke theksuar se çdo rast trajtohet individualisht dhe se vizat humanitare jepen vetëm kur ekziston një rrezik i qartë dhe i drejtpërdrejtë për jetën ose integritetin fizik të personit.

Autoritetet theksojnë gjithashtu rëndësinë e verifikimit të identitetit dhe sigurisë, duke shtuar se situata në terren merret parasysh, por nuk zëvendëson procedurat e detyrueshme.

Konferencë rajonale për drejtësinë ndaj të mbijetuarve të dhunës seksuale të luftës: theksi te përgjegjësia penale dhe kompensimi

Posted on by Alb

Avancimi i qasjes në drejtësi për të mbijetuarit e dhunës seksuale të luftës është në qendër të një konference rajonale që po zhvillohet sot në Prishtinë, me fokus të veçantë në përgjegjësinë penale dhe të drejtën për kompensim. E organizuar nga  Qendra Kosovare për Rehabilitimin e të Mbijetuarve të Torturës – QKRMT , konferenca ka mbledhur gjyqtarë dhe prokurorë nga Kosova dhe vendet e Ballkanit Perëndimor për të diskutuar sfidat në ndjekjen e krimeve të luftës, me theks të veçantë në rastet e dhunës seksuale.

Synimi i këtij takimi është forcimi i bashkëpunimit ndërinstitucional, përmirësimi i hetimeve dhe proceseve gjyqësore, sidomos në aspektin e provave si dhe promovimi i qasjeve të ndjeshme ndaj traumës. Një tjetër shtyllë e rëndësishme e diskutimit mbetet rritja e ndërgjegjësimit për reparacionet dhe kompensimin si pjesë thelbësore e drejtësisë për të mbijetuarit.

Nga jurisprudenca te kompensimi, drejt një drejtësie gjithëpërfshirëse

Në panelin e parë, të titulluar “Krimet e luftës të dhunës seksuale  nga jurisprudenca te kompensimi, drejt një drejtësie gjithëpërfshirëse”, u paraqitën këndvështrime të ndryshme juridike dhe institucionale mbi nevojën urgjente për reforma që synojnë mbrojtjen e dinjitetit të të mbijetuarve.

Në këtë diskutim morën pjesë Ljiljana Stipišić, gjyqtare në Gjykatën e Lartë Penale të Kroacisë; Valon Kurtaj, gjyqtar në Gjykatën e Apelit të Kosovës; Klaudia Kuljuh nga Trial International në Bosnjë dhe Hercegovinë; si dhe Makifete Saliuka, avokate përfaqësuese e viktimave në gjykatë (e angazhuar nga QKRMT), Kosovë. Paneli u moderua nga Selvete Gërxhaliu-Krasniqi, anëtare e Bordit të QKRMT-së dhe ish-gjyqtare e Gjykatës Kushtetuese të Kosovës.

Zëri i të mbijetuarve në qendër të drejtësisë

Një nga momentet më domethënëse të konferencës ishte dëshmia publike e të mbijetuarve, e cila e vendosi në qendër dimensionin njerëzor të drejtësisë.

Vasfije Krasniqi theksoi: “Sot është 14 prill. Një datë që për shumëkënd është thjesht një ditë e radhës në kalendar… por për mua, është dita kur jeta ime ndryshoi përgjithmonë. Isha vetëm 17 vjeç kur kërkova drejtësi, por kjo drejtësi më u mohua. Megjithatë, unë nuk heshta. Në vitin 2018, vendosa të flas publikisht dhe sot ndihem krenare që, falë asaj nisme, katër raste të tjera kanë arritur të fitojnë drejtësinë e merituar.”

Në të njëjtën linjë, Ramadan Nishori bëri thirrje publike: “Mos e mbani të vërtetën tuaj në heshtje. Mos lejoni që frika apo paragjykimi t’ju ndalojnë. Kërkoni drejtësi. Sepse drejtësia është pjesë e shërimit dhe rikthimit te dinjitetit tone!”

Ndërsa Shyrete Tahiri u shpreh: “Unë e kam bërë hapin tim, kam kërkuar drejtësi dhe asnjëherë nuk do te dorëzohem derisa të arrij drejtësinë dhe nuk dua që askush tjetër të mbetet i heshtur siç kam qenë unë. Sot ju inkurajoj: bëjeni edhe ju hapin tuaj. Kërkoni drejtësi.”

Thirrje institucionale për drejtësi të plotë

Drejtoresha Ekzekutive e QKRMT-së, Dr. Feride Rushiti, theksoi se drejtësia për të mbijetuarit shkon përtej vendimeve gjyqësore: “Për të mbijetuarit, drejtësia nuk është vetëm një vendim gjykate është pranimi i asaj që kanë përjetuar dhe përkthimi i saj në mbështetje reale dhe kompensim konkret.Prandaj, kjo konferencë nuk është vetëm një diskutim -por një thirrje për veprim. Që drejtësia që ndërtojmë të mos jetë vetëm ndëshkuese, por shëruese, gjithëpërfshirëse dhe e orientuar nga i mbijetuari”.

Nënkryetari i parë i Kuvendit të Kosovës, Ardian Gola, nënvizoi rolin e institucioneve:

“Institucionet ofrojnë mbështetje institucionale për krijimin dhe avancimin e mekanizmave të drejtësisë. Ne jemi të përkushtuar që të forcojmë mekanizmat e llogaridhënies dhe të mbështesim sistemin, në mënyrë që t’u ofrojë drejtësi të mbijetuarve të dhunës seksuale. Përkushtimi ndaj përkrahjes së të mbijetuarve dëshmohet edhe përmes emërimit të dy të mbijetuarave, Vasfije Krasniqi dhe Shyrete Tahiri, nga U.D. Presidentja, si të deleguara speciale për dhunën seksuale.”

Ndërkohë, Ministrja e Drejtësisë dhe Zëvendëskryeministrja e Kosovës, Donika Gërvalla-Schwarz, theksoi lidhjen e drejtësisë me ndëshkimin e autorëve:

“Njohja ligjore është një hap i rëndësishëm, por jo gjithmonë i mjaftueshëm, sepse e drejta për drejtësi lidhet ngushtë me ndëshkimin e autorëve të krimit, të cilët lëvizin lirshëm. Prandaj, ne si institucione nuk mund të themi se drejtësia për të mbijetuarit është arritur pa u ndëshkuar autorët e krimit.”

Edhe nga sistemi gjyqësor u theksua nevoja për thellim të reformave. Mirjeta Shala, anëtare e Këshillit Gjyqësor të Kosovës, deklaroi: “Këshilli Gjyqësor i Kosovës mbetet i përkushtuar në avancimin e procedurave për ofrimin e qasjes në drejtësi për të gjithë të mbijetuarit e dhunës seksuale gjatë luftës në Kosovë. Megjithatë, drejtësia mbetet e paplotë pa ndëshkimin e autorëve dhe pa realizimin e të drejtës për kompensim të të mbijetuarve. Është jetike që mekanizmat e krijuar të forcohen vazhdimisht, në mënyrë që të mbijetuarve t’u ofrohet drejtësi e plotë dhe e dinjitetshme.”

Roli i prokurorisë në forcimin e llogaridhënies

Paneli i dytë u përqendrua në avancimin e llogaridhënies për krimet e luftës të dhunës seksuale, duke vënë theksin në rolin dhe përgjegjësinë e prokurorisë në forcimin e reagimit të sistemit të drejtësisë penale.

Në këtë panel kontribuan me perspektivat e tyre Miroslav Dasović, Zëvendës i Prokurorit të Shtetit të Qarkut në Osijek, Kroaci; Tarik Crnkić, prokuror në Departamentin Special për Krime Lufte në Bosnjë dhe Hercegovinë; Ilir Morina, prokuror special dhe udhëheqës i Departamentit për Hetimin e Krimeve të Luftës në Kosovë; si dhe Leonora Selmani, kryetare e Komisionit Qeveritar për Njohjen dhe Verifikimin e Statusit të të Mbijetuarve të Dhunës Seksuale gjatë Luftës në Kosovë.

Konferenca rajonale “Avancimi i qasjes në drejtësi për të mbijetuarit e dhunës seksuale të luftës: përgjegjësia penale dhe e drejta për kompensim” po zhvillohet në Prishtinë si një platformë e rëndësishme për thellimin e dialogut profesional dhe institucional, me synimin që drejtësia për të mbijetuarit të mos mbetet vetëm një parim, por të shndërrohet në realitet të prekshëm.

 

 

 

 

 

 

BE shtrëngon rregullat për importin e çelikut, preket edhe Zvicra

Posted on by Alb

Bashkimi Evropian po forcon rregullat për importin e çelikut me qëllim mbrojtjen e industrisë së vet vendase. Sasitë e importit pa tarifa doganore do të reduktohen ndjeshëm, ndërsa për importet shtesë do të aplikohen tarifa më të larta. Zvicra nuk ka përfituar përjashtim nga këto masa.

Sipas vendimmarrësve të BE-së, importet pa tarifa do të kufizohen në 18.3 milionë tonë në vit. Kjo përfaqëson një ulje prej rreth 47% krahasuar me nivelin aktual.

Ndërkohë, për sasi shtesë do të aplikohet një tarifë ndëshkuese prej 50%, dyfish më e lartë se norma aktuale.

Sipas Komisionit Evropian, vetëm shtetet e Zonës Ekonomike Evropiane (ZEE) – Norvegjia, Islanda dhe Lihtenshtajni – do të përjashtohen nga këto masa. Zvicra, megjithëse ka marrëveshje të tregtisë së lirë me BE-në, nuk është përfshirë në këtë përjashtim.

Berna kërkon negociata për kuota

Komisioni Evropian synon të negociojë një zgjidhje me partnerët tregtarë që të jetë në përputhje me rregullat e Organizatës Botërore të Tregtisë (OBT). Komisioneri për Tregti i BE-së, Maroš Šefčovič, ka deklaruar më herët se synimi është të ruhet drejtësia ndaj partnerëve të tregtisë së lirë.

Autoritetet zvicerane kanë kërkuar pa sukses përjashtim nga këto masa muajt e fundit. Tani, Zvicra synon të sigurojë të paktën të njëjtat kuota si më parë.

Presioni nga çeliku i lirë

Sipas autoriteteve zvicerane, prodhimi i çelikut në vend nuk kontribuon në mbikapacitetin global. Megjithatë, BE synon të mbrohet pikërisht nga ky fenomen, i shkaktuar kryesisht nga eksportet e çelikut me çmime të ulëta nga Kina, India dhe Turqia.

Rregullat aktuale për importin skadojnë më 30 qershor. Për hyrjen në fuqi të masave të reja kërkohet miratimi formal nga shtetet anëtare dhe parlamentet, një procedurë që konsiderohet formalitet. Rregullat e reja pritet të hyjnë në fuqi më 1 korrik.

Sistemi i sigurimeve ka ndikim të kufizuar në rritjen e kostove shëndetësore

Posted on by Alb

Një studim i publikuar nga Unisanté në Zvicër tregon se sistemi i sigurimeve shëndetësore ka ndikim të vogël në rritjen e kostove të kujdesit shëndetësor, duke sfiduar debatet e deritanishme politike mbi këtë çështje.

Sipas raportit, vetëm rreth 5% e shpenzimeve shëndetësore lidhen me kostot administrative të sigurimeve, ndërsa 95% e tjera vijnë nga faktorë të ndryshëm që nuk kanë lidhje të drejtpërdrejtë me organizimin e sistemit të sigurimeve.

Autorja kryesore e studimit, ekonomistja Chantal Grandchamp, thekson se fokusi i debatit publik – nëse duhet një fond i vetëm apo konkurrencë mes siguruesve – nuk ndikon ndjeshëm në uljen e kostove. Ajo sugjeron që vëmendja duhet të përqendrohet te shkaqet reale të rritjes së shpenzimeve, si gjendja shëndetësore e popullsisë dhe organizimi i shërbimeve.

Studimi gjithashtu thekson se ulja e primeve të sigurimit dhe kontrolli i kostove janë dy qëllime të ndryshme. Ndërsa primet mund të ulen përmes rritjes së financimit publik, kontrolli afatgjatë i kostove kërkon politika parandaluese dhe promovim të shëndetit.

Unisanté bën thirrje që debatet për reformat në shëndetësi të mos fokusohen vetëm te primet, por edhe te faktorët që ndikojnë drejtpërdrejt në rritjen e kostove.

Diplomohen studentët e programit zviceran të turizmit

Posted on by BR

Arsimi profesional çelës për punësim cilësor në turizëm.

Në kuadër të Samitit të Diasporës, Ministrja e Ekonomisë dhe Inovacionit, Delina Ibrahimaj, mori pjesë në ceremoninë e diplomimit të brezit të parë të studentëve të shkollës së Hoteleri-Turizmit, të cilët kanë ndjekur programin e shkollës zvicerane “École Hôtelière de Lausanne”.

Ky program u ofron studentëve një diplomë të njohur ndërkombëtarisht, e cila garanton kushte dhe paga konkurruese, të njëjta me vendet e Evropës, transmeton albinfo.ch.

Në fjalën e saj, Ibrahimaj theksoi se arsimi profesional është një nga prioritetet e qeverisë, duke u konsideruar si një rrugë e sigurt drejt punësimit cilësor.

“Prej shumë vitesh e kemi vënë fokusin tek arsimi profesional, sepse besojmë që nëpërmjet tij mund të formësojmë një brez të ri, i cili jo domosdoshmërisht ka nevojë të ndjekë universitetin për të pasur një punë të mirëpaguar dhe për t’u kualifikuar,” u shpreh ministrja.

Ajo nënvizoi investimet e kryera në shkolla, konvikte dhe laboratorë, duke krijuar infrastrukturën e nevojshme që nxënësit të zgjedhin arsimin profesional. Sipas saj, ekselenca ndërkombëtare e shtuar në programet e mësimdhënies e afron Shqipërinë me standardet europiane të shërbimeve.

Ibrahimaj shtoi se integrimi evropian nuk është thjesht një listë detyrash, por një transformim i plotë në të gjitha fushat ekonomike.

“Jam krenare kur shikoj 60 vajza e djem që kanë marrë standardet e duhura, dinë të japin shërbime në anglisht dhe të përdorin programet e IT, duke mbuluar çdo aspekt nga shërbimi i tavolinës, kuzhina apo fusha të tjera të turizmit,” tha ajo.

Diplomim i parë i studentëve të programit zviceran të turizmit shihet si një hap i rëndësishëm për fuqizimin e arsimit profesional dhe për rritjen e cilësisë së shërbimeve turistike në Shqipëri, duke e bërë vendin më konkurrues në tregun evropian.

Dhoma e Biznesit bën bashkë investitorët shqiptarë nga Diaspora

Posted on by BR

Dhoma e Biznesit të Diasporës ka organizuar me sukses Forumin Ekonomik në kuadër të Samitit të Diasporës 2026, duke sjellë në Tiranë biznese të rëndësishme shqiptare në botë dhe kompani të fuqishme ndërkombëtare që janë të interesuara për tregun shqiptar.

Kryetari i Dhomës së Biznesit të Diasporës, Ardian lekaj dha mesazhe të rëndësishme për mbështetjen e investimeve të diasporës dhe rëndësinë që ato mund të japin për ekonominë shqiptare.

Nga ana tjetër, ministrja për Ekonominë dhe Inovacionin, Delina Ibrahimaj premtoi mbështetje për këto biznese, duke sjellë si shembull fondet e programit Start Up, prej të cilave përfitojnë dhe shqiptarët e diasporës, shkruan Scan, transmeton albinfo.ch.

Në një sallë të mbushur plot me biznese të diasporës, sipërmarrës vendas, kompani të huaj dhe përfaqësues të institucioneve shqiptare u fol për projekte dhe sektorë konkretë, ku mund të investohet dhe diaspora të japë një kontribut real.

Shqipëria është vendi i tretë në botë për diasporën më të madhe. Kryesisht në Itali, Greqi, Shtetet e Bashkuara të Amerikës, Gjermani, Kanada, Mbretërinë e Bashkuar e Belgjikë jetojnë e punojnë 2.2 milionë qytetarë. Me organizimin e Dhomës Ekonomike të Diasporës, me në epiqendër fabulën “Përmes rrënjëve lartësohemi”, shqiptarët e suksesshëm nëpër botë u mblodhën në Tiranë, duke garantuar se lidhja me Shqipërinë do të vijojë edhe më e fortë.

Të dhënat tregojnë se pjesa më e madhe e investimeve nga shqiptarë të diasporës, veçanërisht në pesë vitet e fundit, kanë shkuar në projekte në sektorë, si argotizmi, turizmi, bujqësia dhe shërbimet financiare.

Përfitimet ekonomike të Shqipërisë nga diaspora shtrihen në disa drejtime, te kapitali, dija, eksperienca, investimet e huaja, turizmi dhe mbi të gjitha te paratë që sjellin për familjet në vendlindje. Për të kuptuar madhësinë e remitancave, mjafton të kujtojmë se vetëm gjatë vitit të shkuar ato arritën në 1.1 miliardë euro. Sot roli i diasporës bëhet edhe më jetik në rrugën e anëtarësimit në Bashkimin Evropian dhe bizneset e diasporës mund të japin një kontribut të madh në transformimin e biznesit shqiptar për të qenë gati për tregjet evropiane.

Takimi Hoxha-Konjufca: Koordinim të ngushtë Shqipëri-Kosovë në çdo çështje të interesit kombëtar

Posted on by BR

Ministri për Evropën dhe Punët e Jashtme, Ferit Hoxha është takuar me Zëvendëskryeministrin e Parë dhe Ministrin e Punëve të Jashtme dhe Diasporës së Kosovës, Glauk Konjufca, në kuadër të Samitit të IV-t të Diasporës.

Ky samit është një dëshmi e qartë e vullnetit tonë të përbashkët për ta shndërruar diasporën shqiptare në një fuqi të organizuar dhe vendimtare për të ardhmen tonë kombëtare. Diaspora jonë mbetet një aset i pazëvendësueshëm — një urë e gjallë që lidh kombin tonë me botën dhe një motor i fuqishëm zhvillimi, që kontribuon drejtpërdrejt në forcimin e ekonomisë, shoqërisë dhe identitetit tonë”, u shpreh Hoxha.

“Në vijim të një dialogu intensiv dhe të frytshëm, takimi i sotëm riafirmoi vendosmërinë tonë për të çuar përpara bashkëpunimin strategjik Shqipëri – Kosovë. Ne jemi të vendosur ta thellojmë këtë bashkëpunim në çdo fushë prioritare, nga ekonomia dhe infrastruktura te energjia, arsimi, kultura, mbrojtja dhe siguria. Theks të veçantë i dhamë nevojës për riaktivizimin e mekanizmave të përbashkët institucionalë, si dhe përshpejtimin e projekteve madhore kombëtare.

Në planin rajonal dhe ndërkombëtar, Shqipëria mbetet e palëkundur në mbështetjen e saj për Kosovën dhe perspektivën e saj euroatlantike.

Theksuam qartë se momenti pozitiv në marrëdhëniet e Kosovës me Bashkimin Evropian duhet të shfrytëzohet pa vonesë. Dhënia e statusit të vendit kandidat për Kosovën është një domosdoshmëri politike dhe strategjike e mirëvendosur në kohë dhe një investim me vlerë për të ardhmen evropiane të rajonit tonë. Shqipëria do të vijojë të jetë një zë i fuqishëm në mbështetje të subjektivitetit ndërkombëtar të Kosovës, në çdo aspekt.

Ne nuk kemi luksin e pritjes. Koha kërkon veprim, vendosmëri, bashkërendim dhe unitet. Prandaj, riafirmuam angazhimin tonë për koordinim të ngushtë dhe veprim të përbashkët në çdo çështje të interesit kombëtar, me synimin e qartë për të investuar së bashku në stabilitet afatgjatë, zhvillim të qëndrueshëm për qytetarët tanë, si dhe në paqen, sigurinë dhe bashkëpunimin rajonal”, theksoi Hoxha.

 

Zjarr në Tiranë, 7 të asfiksuar, të moshuarit ndihmohen të dalin nga flakët

Posted on by BR

Një pallat është përfshirë nga flakët pasditen e kësaj të marte në Tiranë, përballë spitalit “Nënë Tereza”.

Flakët përpinë të gjithë pallatin duke e djegur brenda pak minutash, ndërsa banorët nxituan të evakuoheshin. Në pamjet e siguruara nga gazetari i Top Channel Bledar Korreshi, shiheshin banorët, mes tyre të moshuar që dilnin nga ndërtesa, transmeton albinfo.ch.

Në vendin e ngjarjes ndodhen disa forca zjarrëfikëse, por mbeten ende të paqarta rrethanat sesi ra zjarri që dogji gjithë fasadën e jashtme të banesës. Deri në këto momente janë asfiksuar nga flakët 7 persona, mes tyre dy zjarrfikës.

Ndërkohë raportohet për dëme të konsiderueshme materiale. Në ndihmë të zjarrfikësve janë edhe 2 helikopterë Cougar. Në vendin e ngjarjes ndodhet i ministri i Brendshëm, Besfort Lamallari.

youtube.com/watch?v=oxIfsnCjZ4g&source_ve_path=MjM4NTE&embeds_referring_euri=https%3A%2F%2Ftop-channel.tv%2F

Gjeneva vendos “frena” për Airbnb: Masa të reja për të mbrojtur banesat

Posted on by BR

Autoritetet në Gjenevë po planifikojnë të forcojnë kontrollin mbi qiratë afatshkurtra përmes platformave si Airbnb, në një përpjekje për të adresuar mungesën e banesave në qytet.

Masat e reja synojnë të kufizojnë përdorimin e apartamenteve për qëllime turistike, pasi rritja e këtij lloji të qirave konsiderohet si një faktor që po redukton ofertën për banorët lokalë, transmeton albinfo.ch.

Gjeneva tashmë ka ndër rregulloret më të rrepta në Zvicër për qiratë afatshkurtra, përfshirë kufizime në numrin e ditëve që një pronë mund të jepet me qira pa leje të veçantë.

Ekspertët theksojnë se presioni mbi tregun e banesave është rritur ndjeshëm vitet e fundit, duke shtyrë autoritetet lokale të ndërmarrin hapa më të ashpër për të mbrojtur hapësirën e banimit për rezidentët. Në shumë qytete zvicerane dhe evropiane, Airbnb është bërë një çështje e debatit publik për shkak të ndikimit në çmimet e qirave dhe disponueshmërinë e banesave.

Me këto masa, Gjeneva synon të vendosë një ekuilibër mes turizmit dhe nevojës për strehim, duke garantuar që banesat të mos përdoren kryesisht për qëllime komerciale në dëm të banorëve lokalë.

Pse qeveria zvicerane nuk po ndërhyn për çmimet e larta të karburantit?

Posted on by BR

Çmimet e benzinës dhe naftës janë rritur ndjeshëm javët e fundit, kryesisht për shkak të zhvillimeve ndërkombëtare dhe rritjes së çmimit të naftës në tregjet globale. Në disa raste, rritja ka qenë mbi 10% për benzinën dhe deri në 20–25% për naftën, duke reflektuar tensionet gjeopolitike dhe ndërprerjet në furnizim, shkruan The Local, transmeton albinfo.ch.

Megjithatë, ndryshe nga vendet si Gjermania apo Austria që kanë ndërhyrë me ulje taksash apo masa lehtësuese, autoritetet zvicerane nuk kanë ndërmarrë hapa të tillë. Arsyeja kryesore lidhet me filozofinë ekonomike të vendit, e cila favorizon tregun e lirë dhe shmang ndërhyrjet direkte në çmime.

Ekspertët theksojnë se në Zvicër çmimet e karburantit ndikohen më shumë nga faktorët globalë sesa nga politika e brendshme, prandaj ndërhyrjet e qeverisë do të kishin efekt të kufizuar. Për më tepër, sistemi tatimor dhe struktura e tregut bëjnë që çmimet të jenë relativisht më stabile krahasuar me vendet e Bashkimit Evropian.

Një tjetër arsye është se inflacioni në Zvicër mbetet relativisht i ulët, edhe pse është rritur së fundmi për shkak të energjisë dhe karburanteve. Autoritetet nuk shohin nevojë për masa urgjente, pasi ndikimi në ekonominë e përgjithshme konsiderohet i moderuar

Ndërkohë, qytetarët përballen me kosto më të larta në pompë, ndërsa ekspertët paralajmërojnë se çmimet mund të mbeten të larta edhe për një periudhë, për shkak të pasigurive në tregjet ndërkombëtare të energjisë.

Në këtë kontekst, qasja e Zvicrës mbetet e kujdesshme: më pak ndërhyrje direkte dhe më shumë besim në stabilitetin e tregut, ndonëse kjo nënkupton që konsumatorët duhet të përballen vetë me rritjen e çmimeve në afat të shkurtër.

Evropa rrezikon mungesë të karburantit për avionë në të ardhmen e afërt

Posted on by BR

Sipas raportimeve, rritja e kërkesës për fluturime, së bashku me kufizimet në prodhim dhe tranzicionin drejt karburanteve më të qëndrueshme, po krijojnë presion mbi furnizimin me karburant për avionë (jet fuel).

Një faktor kyç është kalimi gradual drejt karburanteve të qëndrueshme të aviacionit (SAF), të cilat synojnë reduktimin e emetimeve të karbonit. Megjithatë, prodhimi i këtyre karburanteve mbetet ende i kufizuar dhe nuk arrin të përmbushë kërkesën në rritje, shkruan The Local, transmeton albinfo.ch.

Ekspertët paralajmërojnë se kjo situatë mund të çojë në rritje të çmimeve të biletave dhe në kufizime të mundshme të fluturimeve, sidomos gjatë sezonit të ngarkuar të verës.

Në të njëjtën kohë, infrastruktura aktuale e furnizimit dhe rafinimit në Evropë po përballet me sfida, përfshirë mbylljen e disa rafinerive dhe ndryshimet në zinxhirët globalë të furnizimit.

Industria e aviacionit po kërkon masa urgjente për të siguruar stabilitet në furnizim, ndërsa autoritetet evropiane po përpiqen të balancojnë objektivat klimatike me nevojat ekonomike dhe të transportit.

Nëse nuk gjenden zgjidhje afatshkurtra, ekspertët paralajmërojnë se Evropa mund të përballet me një periudhë të pasigurt për udhëtimet ajrore dhe industrinë e fluturimeve.

Vritet një shqiptar në Suedi

Posted on by BR

Një 20-vjeçar shqiptar është vrarë pas disa të shtënave me armë zjarri në Helsingborg të Suedisë.

Sipas mediave suedeze, alarmi u mor pak para mesnatës dhe zona u rrethua nga forcat policore.

Policia kreu një hetim gjatë natës, por ende nuk ka të dyshuar për atentatin ndaj të riut shqiptar.

Ndërkohë bëhet me dije se është plagosur edhe një e re që e shoqëronte të riun shqiptar. Sipas autoriteteve vajza është rreth të 25-ave.

Sakaq, dyshohet se i riu shqiptar ishte pjesë e një rrjeti trafikimi droge në Helsinborg dhe në rajonin Skane, raporton TCH, transmeton albinfo.ch.

Gazetari në Suedi, Ervin Dushi bën me dije se viktima është shtetasi M.Ll, 20 vjeç, emigrant nga Fieri, i cili ndodhej prej vitesh në Suedi së bashku me familjen e tij.

Deputeti shqiptar i Parlamentit suedez: Kontributi i diasporës nga fjala në vepra

Posted on by BR

Gjatë Samitit të Diasporës, në panelin “Diaspora mbarëshqiptare: A po bëjmë çfarë duhet bashkërisht?”, Arbër Gashi, deputet në Parlamentin Suedez, deklaroi se angazhimi i diasporës shqiptare duhet të kalojë nga fjalët në vepra konkrete.

Ai theksoi se, për herë të parë, shqiptarët në Suedi kanë mundësinë të kontribuojnë aktivisht në politikën e vendit, duke sjellë rezultate konkrete për forcimin e lidhjeve midis Suedisë, Shqipërisë dhe Kosovës, transmeton albinfo.ch.

Gashi përmendi takimet e tij të para si deputet me ambasadat e Shqipërisë dhe Kosovës në Suedi, të cilat, sipas tij, kanë çuar në veprime të koordinuara dhe jo vetëm deklarata.

Ai gjithashtu foli për organizimin e festës së 28 Nëntorit në Parlamentin Suedez dhe ceremoninë e Ditës së Çlirimit të Kosovës në Stokholm, si shenja të angazhimit të diasporës për të ruajtur lidhjet me atdheun.

Prioritet sipas Gashit, është ngritja e mocioneve për anëtarësimin e Kosovës në Këshillin e Evropës dhe për intensifikimin e bashkëpunimit ekonomik mes Suedisë dhe Shqipërisë dhe Kosovës.

Ai apeloi që diaspora shqiptare të angazhohet më shumë në politikën e vendit ku jeton, duke kontribuar aktivisht në partitë politike dhe administratën lokale.

Në lidhje me përfshirjen e diasporës në politikën e vendeve ku jetojnë, Gashi theksoi se është e rëndësishme që të inkurajohen më shumë shqiptarët që të angazhohen në politikën e vendeve ku jetojnë dhe të jenë ambasadorë të vërtetë të kulturës dhe interesave të shqiptarëve.

“Në Suedi, për fat të mirë, nuk jam vetëm. Ne kemi dy deputetë shqiptarë në parlamentin suedez, dhe gjithashtu shqiptarët janë të përfaqësuar në nivele të larta në politikën lokale dhe komunale”, tha deputeti shqiptar Arbër Gashi në parlamentin suedez.

Ali Ahmeti: Gjuha shqipe është e garantuar me ligj

Posted on by BR

Në Samitin e Diasporës, Kreu i Bashkimit Demokratik për Integrim, Ali Ahmeti, ka adresuar atë që ai e cilëson si një “rrezik real” për gjuhën shqipe në Maqedoninë e Veriut, pas protestës së studentëve të drejtësisë atje për të bërë në gjuhën shqipe provimin e magjistraturës.

Duke u rikthyer në zanafillën e Marrëveshjes së Ohrit, Ahmeti kujton se statusi zyrtar i shqipes nuk është thjesht një akt ligjor i brendshëm, por një garanci ndërkombëtare e vulosur nga SHBA, BE dhe NATO, transmeton albinfo.ch.

Ai u bëri thirrje faktorëve politikë dhe garantëve ndërkombëtarë që të ndalojnë çdo tentativë për “gërryerjen” e kësaj arritjeje historike, duke theksuar se stabiliteti dhe e ardhmja e shtetit fqinj janë të lidhura pazgjidhshmërisht me bashkëjetesën dhe të drejtat e barabarta të shqiptarëve.

Ali Ahmeti: Sa i takon gjuhës shqipe në Maqedoni, është një rrezik i vërtetë që mendoj që duhet t’i dalim zot. Gjuha shqipe në Maqedoni të nënshkruar dhe të garantuar nga SHBA, me përfaqësues të dërguarin e George Bush, presidentin e asaj kohe është nënshkrues dhe garantues, po ashtu edhe BE, po ashtu edhe NATO e përfaqësuar nga Robertson, ndaj dhe ne kemi hedhur firmën në marrëveshjen ushtarake, me presidentin Traikovski si UÇK, kemi pranuar marrëveshjen e Ohrit dhe kemi punuar bashkërisht me BE, SHBA dhe NATO-n. Suksesi i kësaj marrëveshje, që nga simbolet kombëtare, arsimi në gjuhën shqipe dhe e folura shqip në administratë dhe përfundimi i ligjit të gjuhës shqipe që është konform me marrëveshjen e Ohrit, gjuhën të cilën e flasin mbi 20% e qytetarëve në Republikën e Maqedonisë së atëhershme, është gjithashtu zyrtare. Çdo koment tjetër, për përmirësimin e ligjin apo për ndryshimin e tij është vetëm për ta gërryer marrëveshjen e Ohrit dhe karakterin e kësaj marrëveshje ndërkombëtare. Përgjegjësinë e kemi të përbashkët, Uashington, Bruksel, NATO, forcat politike shqiptare dhe ato maqedonase. Maqedonia ka ardhmëri në bashkëjetesë, bashkëqeverisje vetëm me shqiptarët. Pa shqiptarët, nuk mund të mbijetojë dhe ditët i ka të numëruara.

Thirrjet telefonike të padëshiruara nga kompanitë e sigurimeve vazhdojnë në Zvicër, pavarësisht ndalimit

Posted on by Drin Reçica

Pavarësisht se që nga 1 shtatori 2024 në Zvicër është në fuqi ndalimi i thirrjeve telefonike të pakërkuara nga kompanitë e sigurimeve shëndetësore, kjo praktikë vazhdon të raportohet nga qytetarët, përcjell albinfo.ch.

Autoriteti zviceran i mbikëqyrjes së tregut financiar FINMA, i cili është përgjegjës për rregullimin e veprimtarisë së siguruesve shëndetësorë, ka bërë të ditur se shkeljet nuk janë ndalur plotësisht.

“Vazhdojmë të marrim rregullisht raportime për shkelje të kësaj rregulloreje,” deklaroi zëdhënësja e FINMA-s, Ursula Keel.

Sipas autoriteteve, një nga arsyet e mosrespektimit të ndalimit mund të jetë fakti se deri më tani nuk janë vendosur gjoba ndaj shkelësve, gjë që mund të ketë ndikuar në vazhdimin e kësaj praktike./Albinfo.ch

Aplikacion i ri mund të thjeshtojë pagesat në transportin publik në Zvicër

Posted on by Drin Reçica

Një aplikacion i ri mund të thjeshtojë ndjeshëm pagesat në transportin publik në Zvicër, duke eliminuar nevojën për bileta tradicionale apo skanime manuale, përcjell albinfo.ch.

I quajtur “Bibo”, sistemi automatik i tarifimit përdor teknologjinë Bluetooth për të zbuluar automatikisht kur një pasagjer është në autobus, tren apo tramvaj, dhe më pas llogarit çmimin e udhëtimit në fund të tij.

Sipas grupit të industrisë SwissPass Alliance, projekti pilot për këtë aplikacion të ri do të nisë në fund të muajit prill dhe do të përfshijë rreth 3,000 pjesëmarrës.

Qëllimi i testimit është të vlerësohet saktësia e regjistrimit të udhëtimeve dhe llogaritjes së tarifave, si dhe të mblidhen mendimet e përdoruesve lidhur me funksionimin e sistemit të ri.

Konjufca i kërkon Shqipërisë ta bashkëorganizojnë me Kosovën Samitin e Diasporës

Posted on by Drin Reçica

Zëvendëskryeministri i parë dhe Ministri i Punëve të Jashtme dhe Diasporës në Kosovë, Glauk Konjufca, gjatë fjalës së tij në Samitin e IV-të të Diasporës që po mbahet në Tiranë, ka deklaruar se bashkimi kombëtar është një proces shumëdimensional, i cili duhet të nisë nga bashkëpunimi i ngushtë në kuadër të diasporës, shkruan albinfo.ch.

Konjufca vlerësoi organizimin e samitit dhe kontributin e deritanishëm, duke theksuar rëndësinë e bashkërendimit mes Kosovës dhe Shqipërisë në nismat dhe projektet që lidhen me diasporën shqiptare.

Ai u shpreh se diaspora është një faktor kyç për forcimin e identitetit kombëtar dhe për ruajtjen e lidhjes së brezave të rinj me gjuhën dhe kulturën shqiptare.

“Bashkimi është i shumë dimensioneve, por ta fillojmë nga ky samit së pari. Është bërë një punë e mirë, por herë tjetër kur ta bashkëorganizojmë këtë samit. Ky samit na bashkon të gjithëve. Duhet të identifikojmë se cilat janë projektet që forcojnë identitetin tonë”, u shpreh Konjufca.

Sipas tij, prioritet duhet t’u jepet shteteve ku diaspora shqiptare është më e përqendruar, duke përmendur Shtetet e Bashkuara të Amerikës, Greqinë, Italinë, Gjermaninë dhe Zvicrën si vendet kryesore ku duhet të fokusohen investimet dhe projektet e përbashkëta.

“Në SHBA kemi një mërgatë, në Greqi dhe Itali, dhe Gjermani e Zvicër janë vendimtare për mërgatën tonë dhe këtu duhet të jenë të fokusuara edhe investimet e qeverisë për të bërë projekte të përbashkëta, projekte ku të rinjtë lidhen me gjuhën dhe identitetin shqiptar”, theksoi ai.

Konjufca shtoi se një nga arritjet më të rëndësishme do të ishte bashkëpunimi i Kosovës dhe Shqipërisë për dërgimin e një numri më të madh mësimdhënësish në këto shtete, me mbështetje financiare nga të dyja republikat, në mënyrë që të ruhet dhe forcohet mësimi i gjuhës shqipe në zonat ku mërgata është më e përqendruar.

“Arritja më e madhe do të ishte sikur së bashku Kosova dhe Shqipëria të mund të arrinin në këto shtete të dërgonin një numër të madh të mësimdhënësve që mbulohen financiarisht nga republikat tona dhe mirëmbajnë shkollën shqipe ku është e përqendruar më së shumti mërgata jonë”, përfundoi Konjufca./Albinfo.ch

Komisioni miraton pjesëmarrjen e FSK-së në mision ndërkombëtar në Gaza

Posted on by Drin Reçica

Komisioni për Çështje të Sigurisë dhe Mbrojtjes ka miratuar unanimisht vendimin e Qeverisë së Kosovës për dërgimin e Forcës së Sigurisë së Kosovës (FSK) jashtë vendit, në kuadër të pjesëmarrjes në Forcën Ndërkombëtare Stabilizuese në Gaza, me misione humanitare dhe të sigurisë, përcjell albinfo.ch.

Deputetja e Partisë Demokratike të Kosovës, Ganimete Musliu, e ka vlerësuar këtë vendim si dëshmi të pjekurisë institucionale të Kosovës dhe të profesionalizmit të FSK-së. Sipas saj, pjesëmarrja në misione ndërkombëtare tregon besimin që është ndërtuar në kapacitetet mbrojtëse të vendit dhe gatishmërinë e FSK-së për të marrë përgjegjësi jashtë kufijve shtetërorë.

Edhe deputetja e Lëvizjes Vetëvendosje, Shqipe Selimi, theksoi se FSK-ja është e gatshme të kontribuojë në misione paqeruajtëse së bashku me aleatët ndërkombëtarë, duke vlerësuar se institucionet e Kosovës duhet të vazhdojnë mbështetjen ligjore, financiare dhe logjistike për forcat e saj të sigurisë.

Ndërkohë, deputeti i Lidhjes Demokratike të Kosovës, Fadil Hadergjonaj, e cilësoi këtë zhvillim si lajm pozitiv për Kosovën dhe për FSK-në, duke kërkuar që pjesëtarëve të saj në mision t’u sigurohet mbështetje e plotë në aspektin e pajisjeve dhe logjistikës.

Pjesëmarrja e FSK-së në këtë mision vlerësohet si një hap i rëndësishëm drejt angazhimit më të madh të Kosovës në operacione ndërkombëtare të paqes dhe sigurisë./Albinfo.ch

Të huajt rezidentë po shndërrojnë zonat e Cyrihut në lagje luksoze

Posted on by Drin Reçica

Disa nga zonat përreth Liqeni i Cyrihut po përjetojnë një transformim të shpejtë, duke u kthyer në lagje gjithnjë e më luksoze të dominuara nga blerës të huaj rezidentë, përcjell albinfo.ch.

E ashtuquajtura “Gold Coast”, e vendosur në bregun lindor të Cyrih, ka qenë prej vitesh një destinacion i preferuar për të pasurit e huaj. Megjithatë, tani ajo po përballet me konkurrencë të fortë nga “Platinum Coast”, e cila shtrihet në anën perëndimore të liqenit.

Ndërsa më parë konsiderohej më pak e zhvilluar, “Platinum Coast” ka arritur ta tejkalojë “Gold Coast” në tregun e pasurive të paluajtshme. Në komunat si Kilchberg dhe Horgen, çmimet për metër katror kanë arritur deri në 35,000 franga, ndërsa në “Gold Coast” ato qëndrojnë rreth 30,000 franga.

Sipas të dhënave, kjo zonë e re luksoze po tërheq gjithnjë e më shumë ekspatë, të cilët në disa pjesë tashmë janë më të shumtë në numër se banorët vendas zviceranë./Albinfo.ch