Kapiteni i Zvicrës, Granit Xhaka, është prej lojtarëve më me përvojë në gjithë Kampionatin Botëror.

Ai në ngjarje të mëdha me Zvicrën ka luajtur në 25 ndeshje.

“Kicker” ka paraqitur të mërkurën për këto statistika.

Nga Zvicra, Ricardo Rodriguez ka më së shumti paraqitje në Evropianë dhe Botëror. Mbrojtësi 33-vjeçar ka humbur vetëm 33 minuta prej Botërorit 2014, ka shkruar “Kicker”, transmeton albinfo.ch.

“Kapiteni Granit Xhaka gjithashtu krenohet me numër mbresëlënës prej 25 paraqitjeve në turne madhor. Mjeshtri i mesfushës ka humbur vetëm një ndeshje të madhe gjatë këtyre vjetëve, çerekfinalen e Evropianit 2021 kundër Spanjës, për shkak të grumbullimit të kartonëve të verdhë”, ka shkruar “Kicker”.

Mediumi gjerman ka shkruar po ashtu se “këta dy veteranë e formojnë themelin mbi të cilin trajneri Murat Yakin mund të mbështetet përsëri në turne”.

Xhaka me Zvicrën i ka 146 paraqitje, ndërsa ka kontribuuar me 17 gola.

Pjesëmarrja në Kupën e Botës 2026 nuk sjell vetëm prestigj sportiv, por edhe përfitime të mëdha financiare. Sipas të dhënave të publikuara para turneut, Kombëtarja e Zvicrës do të arkëtojë pothuajse 10 milionë franga zvicerane, edhe nëse eliminohet që në fazën e grupeve.

FIFA ka rritur fondin total të shpërblimeve për Botërorin 2026, i cili për herë të parë zhvillohet me 48 kombëtare. Çdo ekip që siguron pjesëmarrjen në turne përfiton një shumë të konsiderueshme financiare, ndërsa shpërblimet rriten ndjeshëm për skuadrat që avancojnë në fazat eliminatore, shkruan 20min.ch, transmeton albinfo.ch.

Për Zvicrën, kjo do të thotë se vetëm pjesëmarrja në SHBA, Kanada dhe Meksikë garanton të ardhura milionëshe. Në rast të kalimit të fazës së grupeve, federata zvicerane do të përfitojë edhe më shumë, ndërsa ekipet që arrijnë në gjysmëfinale apo finale mund të sigurojnë dhjetëra miliona shtesë.

Këto mjete zakonisht përdoren nga federatat për zhvillimin e futbollit, investime në infrastrukturë, programe për të rinjtë dhe mbështetjen e ekipeve kombëtare. Për këtë arsye, kualifikimi në Botëror konsiderohet një sukses i madh jo vetëm sportiv, por edhe ekonomik.

Me ambicie për të arritur sa më larg në turne, Zvicra synon jo vetëm rezultate historike në fushë, por edhe përfitime të rëndësishme financiare që do të ndihmojnë zhvillimin e futbollit zviceran në vitet e ardhshme.

Sa gjasa ka Zvicra të fitojë Kupën e Botës 2026? Sipas një analize matematikore të publikuar nga mediat zvicerane, shanset e helvetikëve për t’u shpallur kampionë bote janë vetëm 1.16 për qind.

Llogaritjet janë bërë duke u bazuar në modele statistikore, renditjet e ekipeve, formën e skuadrave dhe probabilitetet e kalimit nga një fazë në tjetrën të turneut. Sipas këtyre parashikimeve, Zvicra nuk bën pjesë në grupin e favoritëve kryesorë, por konsiderohet një kombëtare që mund të surprizojë, shkruan Blick, transmeton albinfo.ch.

Favoritët kryesorë për triumfin në Botëror mbeten kombëtaret tradicionale si Brazili, Franca, Anglia, Spanja dhe Argjentina, të cilat gëzojnë shanse dukshëm më të larta për të ngritur trofeun.

Megjithatë, historia e futbollit ka treguar se statistikat nuk janë gjithmonë vendimtare. Zvicra ka qenë një nga skuadrat më të qëndrueshme evropiane në vitet e fundit dhe synon të arrijë rezultatin më të mirë në historinë e saj në një Kampionat Botëror.

Me kapitenin Granit Xhaka në krye dhe një brez të talentuar lojtarësh, helvetikët shpresojnë të sfidojnë parashikimet dhe të avancojnë sa më larg në turneun që po zhvillohet në SHBA, Kanada dhe Meksikë.

Edhe pse probabiliteti prej 1.16 për qind mund të duket i ulët, tifozët zviceranë besojnë se në futboll gjithçka është e mundur dhe se skuadra e Murat Yakinit mund të jetë një nga surprizat e mëdha të Botërorit 2026.

Të dhënat e fundit kanë zbuluar klubet që kanë kontribuar me më shumë futbollistë në Kupën e Botës 2026, duke reflektuar përqendrimin e talentit në elitën e futbollit botëror.

Në krye të listës qëndron Manchester City, i cili do të ketë plot 19 lojtarë të angazhuar në këtë turne, duke konfirmuar edhe një herë thellësinë dhe cilësinë e skuadrës angleze.

Në vendin e dytë renditet Bayern Munich me 18 futbollistë të grumbulluar me kombëtaret e tyre.

Më pas vijnë dy gjigantët evropianë, Paris Saint-Germain dhe Arsenal, të cilët kanë nga 16 lojtarë secili të përfshirë në Botëror, transmeton albinfo.ch.

Në vendin e pestë pozicionohet Barcelona me 15 përfaqësues, ndërsa një grup klubesh të njohura si Manchester United, Crystal Palace dhe Atlético Madrid kanë secila nga 12 lojtarë të thirrur për turneun më prestigjioz të futbollit botëror.

Botërori i Meksikës, Kanadasë dhe SHBA do të nisë këtë të enjte me ndeshjen hapëse mes Meksikës dhe Afrikës së Jugut në stadiumin Azteca.

Bëhet fjalë për një edicion historik, teksa për herë të parë do të jenë 48 skuadra pjesëmarrëse, por edhe për faktin se do të ketë disa risi në rregullore.

Modifikimet e miratuara nga IFAB do të ndryshojnë shumë mënyrën e të luajturit, gjykimit dhe menaxhimit të ndeshjeve. Por le ta nisim me ndryshimet të kanë të bëjnë me sistemin VAR

Më shumë pushtet sistemit VAR. Teknologjia do të ketë një rol gjithnjë e më qendror në ndeshje. Deri tani VAR mund të ndërhynte në vetëm 3 raste: goli, penalltia dhe ndëshkimet me karton të kuq direkt. Që nga ndeshja e së enjtes, ata që do të jenë përpara monitorit do të duhet të rishikojnë më shumë situata. Sistemi VAR do të mund të korrigjojë akordimin e gabuar të një goditje këndi, për shembull kur prekja e fundit e topit është e dukshme nga sulmuesi. Ndërhyrja do të bëhet e mundur vetëm nëse nuk e vonon rifillin e lojës. Teknologjia po ashtu do të mund të korrigjojë ndëshkimin me karton të kuq pas kartonit të dytë të verdhë të dhënë pa të drejtë dhe gabimet në identifikimin e lojtarëve për sanksionet me kartonë të verdhë apo të kuq. IFAB për më tepër ka vendosur edhe për një saktësim në protokollin VAR në lidhje me faullet e kryerë nga skuadra që sulmon përpara se topi të rivihet në lojë në goditje këndi apo dënimi. Nëse një thyerje e normës do të ketë ndikim te një gol, penallti apo sanksion disiplinor, gjyqtari në monitor mund t’i kërkojë atij në fushë të rishohë episodin. Nëse do të konfirmohet parregullsia, loja do të rinisë me përsëritjen e goditjes standarde dhe me sanksionin e mundshëm disiplinor

Lufta ndaj humbjes së lojë. Ashpërsi maksimale kundër atyre që kërkojnë të luajnë me kronometrin, duke nisur nga zëvendësimet. Ata që duhet të lënë fushën e lojës, duhet ta bëjnë brenda 10 sekondave që nga komunikimi i zëvendësimit. Në rast të kundërt, futbollisti që do të duhet të hyjë është i detyruar të presë 1 minutë. Ky rregull u aplikua për herë të parë në miqësoren Japoni-Islandë me skuadrën vendase që shfrytëzuan për 60 sekonda superioritetin numerik për të shënuar golin e fitores 1-0. Po kështu, përveç rregullit të 8 sekondëshit për portierin në momentin që ka topin në duar, shtohen kufizime të tjera për rivëniet anësore dhe ato fundore. Nëse arbitri sheh se një skuadër po humbet kohë, do të nisë numërimin mbrapsht prej 5 sekondash. Nëse topi nuk rivihet në lojë brenda limieteve, rivënia anësore do t’i shkojë skuadrës kundërshtare, ndërsa ajo fundore do të bëhet goditje këndi. Për të evituar ndërprerje taktike dhe simulime, nëse një futbollist merr kurë mjekësore duhet që të qëndrojë jashtë fushe të paktën 1 minutë pas trajtimit. Përjashtim bëjnë vetëm portierët në rast të traumave të rënda. Bashkë me këto masa, duke parë edhe temperaturat e larta që parashikohen në SHBA, në çdo pjesë loje do të ketë një pauzë për hidratim prej 3 minutash.

Kartonët e kuq. Gjatë Botërorit 2026, futbollistët nuk do të mund të mbulojnë gojën teksa flasin me shokët e skuadrës, kundërshtarët apo gjyqtarët. FIFA e mori këtë mase pas episodit mes Prestiannit dhe Vinicius në sfidën e Ligës së Kampioneve mes Benficas dhe Realit të Madridit për të limituar tensionet dhe sjelljet antisportive. Nëse biseda do të konsiderohet i ndezur apo provokues, ekziston rreziku i ndëshkimit me karton të kuq. Me karton të kuq do të ndëshkohen edhe ata që braktisin fushën e lojës për protestë pa autorizimi, siç ndodhi në finalen e Kupës së Afrikës mes Senegalit dhe Marokut.