Shtetet e Bashkuara të Amerikës kanë vendosur një paketë të re tarifash prej 10 për qind për importet ndaj të gjitha shteteve, e cila ka hyrë në fuqi më 24 shkurt. Sipas një raporti të publikuar më 26 shkurt nga BERZH-i, Kosova renditet ndër vendet më të goditura nga këto masa në rajonin ku operon kjo bankë, përcjell albinfo.ch.

Sipas raportit, tarifat e importit të SHBA-së për vendet e rajonit janë rritur mesatarisht me 0.3 pikë përqindjeje, ndërsa 29 shtete përballen tani me tarifa më të larta. Rritjet më të mëdha janë regjistruar në Armeni, Egjipt, Kenia, Kosovë dhe Ukrainë.

“Rritja e tarifave për Armeninë, Egjiptin, Kenian, Kosovën e Ukrainën lëviz nga +3.7 deri në +4.8 pikë përqindjeje”, thuhet në raport.

Në anën tjetër, vende si Bosnja dhe Hercegovina, Serbia, Moldavia dhe Tunizia konsiderohen përfituese relative nga ndryshimet e fundit, pasi tarifat ndaj tyre kanë pasur rritje minimale ose kanë mbetur pothuajse të pandryshuara.

Raporti nënvizon se mesatarisht tarifat e importit të SHBA-së për vendet ku operon BERZH-i janë rritur nga 14.6 në 15 për qind, duke shtuar presionin mbi eksportuesit, përfshirë edhe ata nga Kosova. Megjithatë, sipas dokumentit, ndikimi ka rezultuar më i ulët sesa ishte parashikuar fillimisht.

Më 20 shkurt, Gjykata Supreme e SHBA-së rrëzoi tarifat globale të vendosura nga presidenti Donald Trump, me përjashtim të atyre për industrinë e çelikut, aluminit, drurit dhe automobilave, duke argumentuar se ligji emergjent për fuqitë ekonomike nuk ia lejon presidentit të vendosë tarifa të tilla.

Pas këtij vendimi, Trump u zotua për tarifa të reja prej 15 për qind, por më pas vendosi ta zëvendësojë tarifën 10 për qind me një tjetër në të njëjtën vlerë, këtë herë në bazë të nenit 122 të Aktit të Tregtisë të vitit 1974, i cili i jep presidentit kompetencë të vendosë tarifa për 150 ditë pa miratimin e Kongresit.

Sipas të dhënave të Doganës së Kosovës, eksportet drejt SHBA-së kanë shënuar rritje të ndjeshme në vitet e fundit: nga rreth 3 milionë euro në vitin 2019, në mbi 131 milionë euro në vitin 2022.

Produktet që Kosova eksporton në tregun amerikan përfshijnë ushqime, lëngje, tekstil, dyshekë, si dhe prodhime nga druri dhe plastika.

Diplomatja amerikane është parë duke hyrë në Presidencë, por nuk ka dhënë deklarata për media, përcjell albinfo.ch.

E ngarkuara me Punë në Ambasadën e Shteteve të Bashkuara të Amerikës në Kosovë, Anu Prattipati, është parë sot duke hyrë në Presidencën e Republikës së Kosovës për një takim me presidenten Vjosa Osmani.

Diplomatja amerikane nuk ka pranuar të deklarohet për mediat lidhur me arsyen e vizitës apo temat e diskutimit.

Takimet mes Prattipatit dhe presidentes Osmani kanë qenë të rregullta, duke reflektuar bashkëpunimin e vazhdueshëm ndërmjet Presidencës së Kosovës dhe Ambasadës së SHBA-së në Prishtinë.

Kanë mbetur vetëm edhe pak ditë që të gjendet dhe votohet në Kuvend presidenti i ardhshëm i Kosovës, përcjell albinfo.ch.

Deri më tani, kandidaturën haptazi e ka bërë vetëm presidentja aktuale, Vjosa Osmani, por që duket se nuk ka mbështetje të gjerë nga deputetët.

Në opinion u përfolën edhe emra nga familja Jashari.

Ishte madje ministri i Jashtëm, Glauk Konjufca, ai që tha sot pas takimit me homologen e tij shqiptare, Elisa Spiropali, se mes partive politike deri tani ka konsensus vetëm për një president që do të vinte nga familja Jashari.

Por, nga vetë familja Jashari kanë mohuar se kanë ambicie të tilla.

Ishte fillimisht Murat Jashari, djali i Rifat Jasharit, vëllait të Adem Jasharit, që tha për VOX Kosova se nuk ka interesim apo qëllim për t’u bërë president i Kosovës, dhe se “ua kam bërë të qartë partive politike se cilat janë arsyet pse unë nuk e bëj, sepse mbi supet e mia rëndon një barrë e madhe”.

Më vonë, ish-kryetari i komunës së Skenderajt, Bekim Jashari, djali i Hamzë Jasharit, vëllai tjetër i Adem Jasharit, i tha Radios Evropa e Lirë se ai mban qëndrimin e djalit të xhaxhait, duke shtuar “nuk kam çka t’i shtoj kësaj, asnjë pikë apo presje”.

Ditë më parë, kryeministri i Kosovës, Albin Kurti, ka qëndruar në Prekaz të Skenderajt te familja Jashari. Ai ka konfirmuar për mediat se ka biseduar me Rifat Jasharin “për çështje politike”.

Sot, Komisioni për Integrime Evropiane do të mbajë një mbledhje ku do të shqyrtojë amendamentet e dy marrëveshjeve financiare ndërmjet Republikës së Kosovës dhe Bashkimit Evropian, përcjell albinfo.ch.

Në fokus të diskutimit do të jetë Projektligji nr. 10/L-010, që parasheh ratifikimin e “Amendamentit nr. 2 të Marrëveshjes Financiare për Programin IPA 2017, pjesa e parë”.

Po ashtu, Komisioni do të shqyrtojë Projektligjin nr. 10/L-009, i cili ka të bëjë me ratifikimin e “Amendamentit nr. 3 të Marrëveshjes Financiare për Programin IPA 2018”.

Këto amendamente janë pjesë e përpjekjeve të Kosovës për të forcuar bashkëpunimin financiar me Bashkimin Evropian dhe për të siguruar zbatimin e projekteve të programit IPA në vend.

Aeroporti Ndërkombëtar ‘Adem Jashari’ do të përmirësojë kontrollin e udhëtarëve me pajisje të avancuara të skanimit, në kuadër të rritjes së efikasitetit dhe sigurisë në aeroport, shkruan albinfo.ch.

Sipas njoftimeve zyrtare, çdo person që udhëton nga Prishtina drejt destinacioneve të tjera është i obliguar të kalojë kontrolle të sigurta përmes pajisjeve të skanimit. Për të përballuar rritjen e numrit të udhëtarëve dhe për të përmirësuar procesin e kontrollit, pritet të instalohen pajisjet e reja të standardit C3.

Këto pajisje moderne, të prezantuara së fundmi në treg, mundësojnë kontrolle më të shpejta, më të sakta dhe më të detajuara, duke rritur sigurinë dhe duke përshpejtuar procedurat për udhëtarët.

Autoritetet e aeroportit kanë theksuar se ky investim synon të kombinojë teknologjinë e avancuar me procedurat efikase, duke garantuar përvojë më të mirë dhe siguri maksimale për të gjithë udhëtarët./Albinfo.ch