Ish-udhëheqësi i UÇK-s, Rexhep Selimi, ka deklaruar se historia e Kosovës nuk mund të rishkruhet në një sallë gjyqi, gjatë fjalës së tij përfundimtare të mbajtur të mërkurën para trupit gjykues në Hagë, përcjell albinfo.ch.

Selimi theksoi se Ushtria Çlirimtare e Kosovës nuk u formua nga dëshira, por nga nevoja për mbijetesë, përballë, siç tha ai, politikave shtypëse të Serbisë ndaj shqiptarëve të Kosovës.

“Serbia kurrë nuk e fshehu qëllimin e saj ndaj shqiptarëve. Prandaj pyes sërish: çfarë duhet të bënim ne? Të prisnim radhën për t’u vrarë apo të iknim nga shtëpitë tona?”, u shpreh Selimi.

Ai shtoi se UÇK-ja u krijua si reagim i domosdoshëm ndaj dhunës dhe represionit.

“UÇK-ja nuk u krijua nga dëshira, por nga nevoja. Për mua, të qenit bashkëluftëtar i Adem Jashari-t është nderi më i madh. Po, kam bartur armë. Armët për ne ishin mbijetesë. UÇK nuk kishte qëllim tjetër përveç lirisë. UÇK ishte ushtri çlirimtare”, deklaroi ai, raporton KSP.

Në përmbyllje të fjalës së tij, Selimi u shpreh i bindur se veprimet e ndërmarra nga ai dhe bashkëluftëtarët e tij kanë qenë të drejta.

“Edhe sot do ta bëja të njëjtën gjë. Prandaj na mbështeti edhe NATO-ja”, tha Selimi mes tjerash.

Ish-kryetari i Kuvendit të Kosovës, Kadri Veseli, ka deklaruar se drejtësia, ndonëse mund të vonohet, nuk mund të mohohet, gjatë fjalës së tij para Dhomat e Specializuara të Kosovës në Hagë, përcjell albinfo.ch.

Veseli theksoi se të gjitha veprimet e tij kanë qenë në përputhje me ligjin dhe se, sipas tij, nuk ekziston asnjë provë që e lidh atë me kryerjen e krimeve të luftës.

“Unë e di kush jam, çfarë kam bërë dhe çfarë nuk kam bërë. Veprimet e mia kanë qenë ligjore. Gjykata duhet me çdo kusht të mbrojë të vërtetën, drejtësinë dhe paanësinë”, u shpreh Veseli.

Ai shtoi se edhe në momentet më të vështira nuk e ka humbur besimin se e vërteta do të dalë në pah.

“Edhe në momentet më të errëta nuk e humba besimin se e vërteta do të triumfojë. Liria nuk mund të ndërtohet mbi padrejtësi”, deklaroi ai.

Veseli foli gjithashtu për jetën e tij personale dhe sfidat me të cilat është përballur ndër vite, duke përmendur se familja e tij ka jetuar për një kohë të gjatë nën presion dhe kërcënime të vazhdueshme.

“Familja ime dhe unë kemi jetuar në persekutim të pandërprerë. E di shumë mirë se çfarë do të thotë të jetosh nën kërcënim të vazhdueshëm. Është një përvojë që nuk do t’ia dëshiroja askujt”, theksoi ai.

Në përmbyllje, Veseli nënvizoi se pas dekadash hetimesh dhe shqyrtimi dokumentesh, sipas tij, nuk është gjetur asnjë provë që ai ka kryer krime.

“Pas dekadash hetimesh dhe dokumentesh, nuk ka asnjë provë se kam kryer krime”, tha Veseli.

Ai shtoi se vendimi për t’u kthyer në Kosovë ishte i motivuar nga pamundësia për të qëndruar indiferent ndaj vuajtjeve të popullit të tij.

Ish-presidenti i Kosovës, Hashim Thaçi, ka nisur fjalimin e tij përmbyllës para trupit gjykues në Hagë, duke deklaruar se është plotësisht i pafajshëm ndaj akuzave të ngritura kundër tij, përcjell albinfo.ch.

Në fillim të fjalës, Thaçi uroi qytetarët shqiptarë me rastin e përvjetorit të shpalljes së Pavarësisë së Kosovë, përpara se të adresonte drejtpërdrejt pretendimet e prokurorisë.

“Për gati tri vjet në këtë sallë ju keni dëgjuar akuzat e prokurorisë. Ju keni dëgjuar edhe të vërtetën. Është vetëm një e vërtetë – unë jam plotësisht i pafajshëm”, deklaroi Thaçi, raporton KosovaPress nga Haga.

Ai rikujtoi se në fillim të vitit 1998 ndodhej jashtë Kosovës, duke studiuar në Zvicër, dhe theksoi se në atë periudhë nuk kishte asnjë plan për marrjen e pushtetit.

“Në kohën e masakrave në fillim të vitit 1998 isha student në Cyrih. Nuk po bëja plane për të marrë kontrollin e Kosovës. I vetmi që bënte plane morbide ishte Slobodan Millosheviq”, u shpreh ai.

Sipas Thaçit, vendimi për t’u kthyer në Kosovë ishte i diktuar nga ndjenja e përgjegjësisë morale dhe dëshira për të kontribuar në luftën për liri.

“Duke parë masakrat në vendin tim, nuk mund të qëndroja indiferent. Vendosa të vij në Kosovë dhe të bëj atë që do të bënte secili prej jush. Për këtë jam krenar dhe nuk pendohem asnjëherë”, tha ai.

Ai shtoi se akuzat e ngritura ndaj tij përbëjnë, sipas tij, një fyerje për sakrificën e heronjve dhe viktimave të luftës, si dhe për përpjekjet e aleatëve ndërkombëtarë.

“Është ofendim për kujtimin e heronjve dhe mijëra viktimave, si dhe për përpjekjet e NATO-s, me të cilët bashkëpunuam ngushtë”, theksoi Thaçi.

Në përmbyllje, ai deklaroi se kundërshtari i vetëm i tij dhe i UÇK-s ishte regjimi i Millosheviqit.

“U ktheva në atdhe për të rrezikuar jetën time për liri. Kontrolli dhe pushteti ishin në duart e hekurta të regjimit të Millosheviqit”, përfundoi ai. /Albinfo.ch

Mbrojtja e Krasniqit besimplotë se ai do të shpallet i pafajshëm

Kundërpërgjigjet e tyre para trupit gjykues në Hagë sot i paraqitën edhe mbrojtja e Jakup Krasniqit, e cila tha se dëshmitë do të çojnë në atë që trupi gjykues të shpall të pafajshëm Krasniqin.

Avokati i Krasniqit, Aidan Ellis u shpreh besimplotë karshi gjyqtarëve në Hagë.

Ellis gjatë fjalës së tij para trupit gjykues hodhi poshtë pretendimet e ZPS se Jakup Krasniqi ishte epror i Bislim Zyrapit.

“Ne jemi besimplotë se kur të zbatoni dhe bëni këtë vlerësim dhe kur të shikoni dokumentet së bashku me dëshmitë e dëshmitarëve dhe kur të zbatoni me rigorozitet parimin e barrës së provës ju do të pajtoheni me argumentet e parashtruara prej nesh dhe kjo do të çojë në shpalljen e pafajshme të Jakup Krasniqit prej jush”, tha ai.

Përveç mbrojtjes së ish-krerëve të UÇK-së sot trupit gjykues pas pushimit ë drekës do t’i drejtohen edhe vetë katërshja e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi e Rexhep Selimi.

Avokati Roberts: Selimi të shpallet i pafajshëm

Geoffrey Roberts i cili përfaqëson Rexhep Selimin tha se klienti i tij duhet të shpallet i pafajshëm. Ai tha se Prokuroria nuk ka asnjë provë “për të siguruar fajësinë e Selimit.

“Zoti Selimi duhet të shpallet i pafajshëm për të gjitha akuzat. Të lirohet menjëherë dhe të kthehet në Kosovë pranë familjes së tij. Asnjë vendim tjetër nuk mund të justifikohet në bazë të provave që janë paraqitur në këtë çështje gjyqësore”, tha Roberts.

 Mbrojtja: ZPS-ja s’ka prova, Veseli të shpallet i pafajshëm

Avokati i Kadri Veselit, Dixon tha se nuk ka prova që Veseli ka marrë pjesë në të ashtuquajturën Ndërmarrjen e Përbashkët Kriminale.

“Edhe kur ndodhej në Kosovë, Veseli ka marrë pjesë në shumë pak takime dhe ka shkuar shumë rrallë në Shtabin e Përgjithshëm. Nuk ka komanduar ndonjë strukturë të inteligjencës apo askënd dhe nuk ka qenë aktiv në Drejtorinë Politike. Madje as anëtarësia në këtë drejtori nuk është vërtetuar”, tha ai.

Dixon kërkoi që trupi gjykues ta shpallë të pafajshëm Kadri Veselin, pasi që nuk  ka prova që e lidhin atë me krimet e pretenduara në atakuzë.

Avokati i Thaçit: Gjykatës ju lutëm shpallni pafajësinë, ZPS-ja nuk ka prova

Avokati i Thaçit: ZPS nuk ka prova kundër Thaçit, nuk paraqitën asgjë

Lluka Mishetiq  avokati  i ish presidentit Hashhimtha se nuk ka asnjë provë që Thaçi ka pasur rol në kryerjen e krimeve apo ka transmetuar “qëllimin e përbashkët kriminal” të të akuzuarve, apo të ketë pasur rol në hartimin dhe shpërndarjen e komunikatave të UÇK-së.

“Konsensusi i provave të dëshmitarëve ndërkombëtarë dhe brenda UÇK-së ishte se Thaçi nuk dyshohej se ishte përfshirë në krime lufte apo në ndonjë politikë të prentenduar që shënjestronte kundërshtarët. ZPS të hënën nuk kishte përgjigje për të hedhur poshtë këto pretendime.”, tha Mishetiq duke shtuar se jo në mungesë të kohës ngase i kishin edhe 45 minuta kohë por nuk kishin përgjigje.

Ai tha se prokuoria dështojë të gjejë prova.

“Mbrojtja e di që  të bëni punën tuaj do të pranoni provat tona. ZPS është që nuk dëshiron të bënin punën tuaj, ata duan që jut ë bëni punën e  atyre. Ata duan që ju të gjeni prova që ata nuk arritën të gjenin..Ata dështuan të gjenin prova”, tha Mishetiq.

Sipas tij, Zyra e Prokurorit të Specializuar bëri “mëkat të madh”, pasi sipas tij, premtoi shumë, por nuk i mbështeti pretendimet me prova.

“Ata kanë premtuar fishekzjarrë, spektakël, por kanë paraqitur asgjë”, shtoi ai.

Mbrojtësi i viktimave: Nuk e kemi obligim të vërtetojmë akuzat ndaj të akuzuarve

Mbrojtësi i viktimave, Simon Laws, në fjalët përfundimtare në gjyqin e madh ndaj ish-krerëve të UÇK-së tha se nuk e kanë  obligim të vërtetojmë akuzat ndaj të akuzuarve.

“Nuk ka kusht ligjor që të vërtetojmë lidhjen mes Selimit dhe krimeve, në asnjë fazë të procesit. Ne sigurisht nuk jemi përpjekur të bëjmë lidhjen e krimeve dhe Selimit. Ne kemi paraqitur informacione dhe prova që kanë pësuar viktimat. Kjo kërkohet nga ne. Nuk është puna jonë të vërtetojmë akuzat ndaj Selimit, kjo është puna e Prokurorisë”, tha Laws.

Kryeministri Edi Rama do të niset drejt Shteteve të Bashkuara të Amerikës ditën e sotme, përcjell albinfo.ch.

Kjo vizitë vjen me ftesë të Presidentit amerikan Donald Trump për të marrë pjesë në takimin e Bordit të Paqes, i cili do të organizohet më 19 shkurt në Uashington.

Shqipëria është anëtare themeluese e Bordit me një mandat të përkohshëm prej tre vitesh.

Ky Bord i inicuar nga Presidenti Trump synon rindërtimin e Gazës dhe zgjidhjen e konflikteve në botë.

Vendi ynë do të përfaqësohet nga kryeministri Edi Rama, ndërsa në Uashington shefi i qeverisë pritet që të zhvillojë edhe takime të tjera të nivelit të lartë.

Presidentja Vjosa Osmani ka konfirmuar se do të jetë në Washington më 19 shkurt për të marrë pjesë në takimin e parë të Bordit të Paqes, pjesë e të cilit u bë edhe Kosova, përcjell albinfo.ch.

“Ne vërtet ndihemi krenarë që i jemi bashkuar presidentit Trump, Shteteve të Bashkuara të Amerikës dhe aleatëve të tjerë në këtë organizatë ndërkombëtare, e cila themelimin e kishte në Davos kurse takimin e parë inaugurues e ka shumë shpejt në Washington D.C., për çka unë do të udhëtojë atje për ta përfaqësuar Republikën e Kosovës”.

Në këtë takim inaugurues, ajo tha se “ka shtete që do ta konkretizojnë mbështetjen, ka shtete që e shprehin përkushtimin i cili më vonë konkretizohet”.

Osmani tha se janë bërë “shumë gjëra pozitive, përfshirë përkrahjen për anëtarësim në NATO” si “rezultat i një pune shumë të afërt me administratën ‘Trump’”.

Kjo përkrahje ajo tha se “po reflektohet edhe në letrën të cilën e ka dërguar presidenti” për 18-vjetorin e pavarësisë së Kosovës.

Në këtë takim inaugurues, ajo tha se “ka shtete që do ta konkretizojnë mbështetjen, ka shtete që e shprehin përkushtimin i cili më vonë konkretizohet”.

Osmani tha se janë bërë “shumë gjëra pozitive, përfshirë përkrahjen për anëtarësim në NATO” si “rezultat i një pune shumë të afërt me administratën ‘Trump’”.

Kjo përkrahje ajo tha se “po reflektohet edhe në letrën të cilën e ka dërguar presidenti” për 18-vjetorin e pavarësisë së Kosovës.

Procesi gjyqësor ndaj ish-krerëve të UÇK-së në Dhomat e Specializuara të Kosovës vijon këtë të mërkurë me një nga momentet më të rëndësishme, paraqitjen e deklaratave përmbyllëse, përcjell albinfo.ch.

Në seancën e sotme do të flasin përfaqësuesi i viktimave, mbrojtja dhe më pas vetë të akuzuarit: Hashim Thaçi, Kadri Veseli, Rexhep Selimi dhe Jakup Krasniqi.

Pas pushimit të drekës, secili prej tyre do t’i drejtohet trupit gjykues me fjalime prej 20 minutash.

Sipas mediave në Kosovë, në seancën përmbyllëse pritet të jetë i pranishëm edhe zëvendëskryeministri i parë, Glauk Konjufca.

Në seancën e fundit, pas deklaratave përmbyllëse të mbrojtjes së Krasniqit, trupi gjykues dhe prokuroria drejtuan pyetje shtesë ndaj palëve.

Pas përfundimit të deklaratave, çështja kalon për vendimmarrje. Gjykatësit kanë deri në tre muaj kohë për të shpallur vendimin ose për të kërkuar shtyrje të afatit.

Prokuroria Speciale ka kërkuar dënimin e katër ish-krerëve me nga 45 vite burg secilit.

Zëvendëskryeministri i parë i Kosovës dhe ministri i Punëve të Jashtme, Glauk Konjufca, ka deklaruar nga Haga se shpreson që verdikti i Gjykatës Speciale të jetë në përputhje me “historinë dhe lavdinë e Ushtrisë Çlirimtare të Kosovës”, përcjell albinfo.ch.

Para fillimit të seancës të mërkurën, në ditën kur katërshja e UÇK-së do të thotë fjalët përfundimtare, Konjufca ka thënë se gjatë këtij procesi ka pasur shkelje të të drejtave të njeriut, veçanërisht sa i përket të drejtës për një gjykim brenda një kohe të arsyeshme.

 Sipas tij, procesi që ka zgjatur mbi pesë vjet ka përbërë “ndëshkim të padrejtë” për të akuzuarit, duke theksuar se ata janë mbajtur të izoluar dhe larg familjeve të tyre për më shumë se pesë vjet.

“Është dita e fundit e një procesi që zgjati shumë. Pretendojmë se është shkelur e drejta elementare e njeriut për t’u gjykuar në kohë të arsyeshme, e drejtë e garantuar me konventa ndërkombëtare dhe me Kushtetutën e Kosovës”, u shpreh ai.

Konjufca përsëriti qëndrimin kritik ndaj Gjykatës Speciale, duke e cilësuar atë si një gjykatë me fokus të njëanshëm ndaj UÇK-së.

“Lufta e popullit të Kosovës ishte luftë e drejtë, mbrojtëse dhe e pastër. Qëllimi i saj nuk ishte sulmi ndaj asnjë populli tjetër, por përballja me forcat serbe që kryen krime në Kosovë. Këtë të vërtetë nuk mund ta ndryshojë asnjë institucion”, deklaroi Konjufca.

Ish-presidenti Hashim Thaçi, ish-kryeparlamentarët Kadri Veseli e Jakup Krasniqi dhe ish-shefi i deputetëve të Lëvizjes Vetëvendosje Rexhep Selimi po akuzohen për ndërmarrje të përbashkët kriminale, lidhur me krime lufte dhe krime kundër njerëzimit. Ish-drejtuesit e Shtabit të Përgjithshëm të UÇK-së i kanë mohuar të gjitha akuzat që u ngarkohen.

Në javën e shkuar e edhe të hënën është dhënë fjala përfundimtare nga palët. Prokuroria e Gjykatës Speciale ka kërkuar nga 45 vjet burgim për secilin, ndërsa mbrojtja lirimin pasi ka konstatuar se organi i akuzës nuk ka argumentuar me asgjë pretendimet e saj.

Gjatë ditës së sotme, katërshja e UÇK-së do të thotë fjalën e vet përfundimtare. Secili kanë nga 20 minuta kohë për deklarime.

Mbreti i Suedisë, Carl XVI Gustaf, i ka dërguar një mesazh urimi Presidentes së Kosovës, Vjosa Osmani, me rastin e 18-vjetorit të Pavarësisë së vendit, përcjell albinfo.ch.

Në mesazhin e tij zyrtar, monarku suedez ka përcjellë urimet më të sinqerta për këtë përvjetor të rëndësishëm shtetëror, duke i dëshiruar popullit të Kosovës prosperitet dhe mirëqenie të vazhdueshme. Sipas komunikatës, ai ka shprehur mbështetjen dhe respektin për arritjet e deritanishme të shtetit të Kosovës.

Kosova shpalli Pavarësinë më 17 shkurt 2008, në orën 15:39, në një seancë të jashtëzakonshme të mbajtur në Kuvendi i Republikës së Kosovës në Prishtinë. Në atë mbledhje morën pjesë 109 nga 120 deputetë, të cilët votuan njëzëri për ta shpallur Kosovën shtet të pavarur, sovran dhe demokratik.

Deklaratën e Pavarësisë e lexoi kryeministri i atëhershëm, Hashim Thaçi, duke kurorëzuar një proces të gjatë politik dhe historik që synonte realizimin e aspiratës për liri dhe mëvetësi të popullit të Kosovës. /Albinfo.ch